इटहरीमा ६ राउन्ड गोलीसहित चाइनिज पेस्तोल बरामद

इटहरीबाट चाइनिज पेस्तोलसहित ३ जना व्यक्ति पक्राउ परेका छन् । साँझ ७ बजे चोरीको बाइक नियन्त्रण लिने क्रममा शङ्कास्पद व्यक्तिहरूको साथबाट पेस्तोल र ६ राउन्ड गोली बरामद भएको हो । इलाका प्रहरी कार्यालय इटहरीको प्रहरी टोलीले उनीहरूलाई नियन्त्रणमा लिएर खानतलासी गर्ने क्रममा उक्त पेस्तोल र गोली बरामद भएको जनाइएको छ ।

पक्राउ पर्नेमा मोरङ टंकीसिनुवारी ठेगाना भएका सुजित मगराती माझी र इटहरी १० बस्ने मुकेश कोइराला छन् । अर्को एक जनाको नाम भने खुलाइएको छैन । उनी प्रत्यक्षदर्शी हुन सक्ने इलाका प्रहरी कार्यालय इटहरीका डिएसपी खगेन्द्र खड्काले अपराध न्युजलाई जानकारी दिए । पक्राउ परेका दुई जना सुनसरीमा पछिल्लो समय बाइक चोरीमा संलग्न भएको प्रहरी स्रोतको भनाई छ । उनीहरूलाई प्रहरीले निगरानी गरी साँझ खनार चौकमा चोरीको एक थान बाइकसहित पक्राउ गरेको हो ।

सो क्रममा उनीहरूको साथबाट पेस्तोल बरामद भएको बताइएको छ । तिनै जनाको थप अनुसन्धान भइरहेको डिएसपी खड्काले बताए ।